चैत १५ राजावादी आन्दोलनः गृहमन्त्री लेखकको पार्टी नै छानबिन आयोगको पक्षमा उभियो

काठमाडौं– चैत १५ गते राजधानीको तीनकुनेमा भएको राजावादी आन्दोलनको झडप, गोली प्रहार र हिंसाका विषयमा न्यायीक छानबिन आयोगको माग भएको छ।

नेकपा माओवादी केन्द्रले गरेको यस्तो मागमा रास्वपासहितको साथ छ। सत्ताको नेतृत्व गरेको नेकपा एमालेले छानबिन आयोग आवश्यक नरहेको बताएको छ।

संसदको राज्य व्यवस्था समितिको बैठकमा शुक्रबार गृहमन्त्री रमेश लेखक जवाफ दिन पुगेका थिए। सोही बेला छानबिन आयोगको माग भएको थियो। एमालेका सांसद रघुजी पन्तले छानबिन आवश्यक नरहेको बताएका थिए। 

तर सोही बैठकमा गृहमन्त्री लेखककै पार्टीका सांसद हृदयराम थानीले भने छानबिन समिति आवश्यक रहेको बताएका थिए। 

उनले भने,‘किन तोकियो तीनकुनेलाई प्रदर्शनस्थल? गृहमन्त्रीलाई प्रदर्शन आपराधिक हुन्छ भन्ने नै थाहा थियो। अनुसन्धान गर्ने निकायले किन बेलैमा सूचना दिनुभएन वा दिन नचाहेको हो? छातीमा हात राखेर सोच्ने कि नसोच्ने? केन्द्रीय कमान्ड के हेरेर बसेको थियो?’ 

सारा सुरक्षाको घेराभित्र एउटा वाटर क्यानललाई एक ठाउँबाट अर्को ठाउँ पुराउन नसकेको कारण खोजेका थानीले भने,‘मुठभेड पनि भएको छैन? प्रदर्शनकारी कोटेश्वर पुगेपछि किन चलाइयो गोली? कसको इच्छा र चाहनाले गोली चलाइयो? म्याद सकिएको अश्रुग्याँस प्रयोग भएको छ। अश्रुग्याँस किन्नै नसकिने अवस्थामा पुगेको हो र सरकार?’

प्रहरीले एक दशकदेखि अश्रुग्यास किन्न सकेको छैन। एक उच्च अधिकारीका अनुसार सरकारले आवश्यक बजेट नदिँदा म्याद गुज्रिएका अश्रुग्यासले काम चलाउन परेको हो।

प्रहरीले पाउने बजेटमा लत्ता कपडा र तलब मात्र खपत हुने प्रकारको भएकाले पनि अश्रुग्यास खरिद गर्न नसकिएको छ।

थानीले सोही बैठकमा अगाडि भने,‘नागरिकको जिउ र धनको सुरक्षा सरकारले गर्नैपर्छ। भोलि ४० हजारको जुलुस निस्किँदा के गर्छ सरकारले? यो मुलुक एउटा बारुदखाना जस्तै भएको छ। ४ हजार मान्छे आउँदा रोक्न नसक्ने अवस्थामा पुगेका छौं। मञ्चमा टियरग्याँस हान्यो। जुलुस भागिरहेको बेला छातीमा गोली लागेको छ। निष्पक्ष छानबिन आयोग गठन गर्नैपर्छ।’