खरेलको अचम्मको अपराधिक आदतः होक्स राखेर बम भनी म्यासेज गर्छन्, यस्तो छ कथा

इटहरी– झापाको कनकाई नगरपालिका–८ का सञ्जय भनिने खगेन्द्र खरेलको अचम्मको आपराधिक आदत रहेको पाइएको छ।

चार महिनाअघि सुनसरीको इटहरी नगरपालिका अगाडि र मोरङसँग सीमा जोडिएको बुढी खोलामा उनैले होक्स राखेर बम रहेको भनी म्यासेज गरे।

जसले दिनैभर जनजीवन प्रभावित मात्र बनेर तिनलाई डिफ्युज गर्न नेपाल प्रहरी, सशस्त्र प्रहरीले सुरक्षा दियो भने सेनाको डिस्पोजल टोली खटियो।

होक्स भनेको नक्कली बम हो। त्यस्तो नक्कली बम राखी आतङ्क सिर्जना गर्ने खरेलसहित लक्ष्मीदेवी थापालाई इलाका प्रहरी कार्यालय इटहरीमा पक्राउ गरी ल्याइएको छ।

दुवै जनालाई केही दिनअघि भारतमा लुकीछिपी बसेको अवस्थामा पक्राउ गरी  सुनसरी ल्याइएको प्रहरीले जनाएको छ।

गत पुस १६ गते खरेलले स्वयं म्यासेजमार्फत प्रहरीलाई बम राखिएको जानकारी दिएका थिए। तर इटहरी नगरपालिका परिसर र बुढी खोला पुलनजिक फेला परेको शङ्कास्पद वस्तु बम नभई ‘होक्स’ भएको पुष्टि भएको थियो।

घटनापछि खरेल भारततर्फ फरार भएका थिए।

खरेलको आपराधिक आदत पनि यस्तै रहेको विवरण फेला परेका छन्। उनी विभिन्न बम विस्फोट घटनामा संलग्न रहँदै आएका छन्। 

२०७६ वैशाख २८ गते गोर्खा जनमुक्ति पार्टीको नाममा झापाको कनकाई नदी पुलमा बम राखेको आरोपमा उनी पक्राउ परेका थिए। 

उक्त अभियोगमा दुई वर्ष पाँच महिना कैद बसेर छुटेका उनी २०७८ माघ ९ र १३ गते झापाका केही चर्चहरूमा शङ्कास्पद वस्तु राखेर पुनः फरार भएका थिए। ती घटनामा झापा प्रहरीले ९ जनालाई पक्राउ गरेको थियो।

त्यसपछि २०७८ चैत १४ गते इटहरी–२ स्थित नवजागृति टोलको एक घरमा सुतली बम विस्फोट भएको घटनामा खरेल पुनः पक्राउ परेका थिए। 
उक्त बम विस्फोटमा रविन थापा र लमजुङका शेरजङ गुरुङ घाइते भएका थिए। 

थापाकै घरमा विस्फोट भएको सो घटनामा खरेलसहित चार जनालाई इटहरी प्रहरीले पक्राउ गरी कारागार चलान गरेको थियो।

कारागारबाट छुटेपछि खरेलले फेरि पुस १६ गते इटहरी उपमहानगरपालिका अगाडि र बुढी खोला पुल नजिक ‘होक्स’ राखेर आतङ्क फैलाउने काम गरेका थिए।

हाल खरेल र थापासँग थप अनुसन्धान भइरहेको प्रहरी स्रोतले जनाएको छ।