राजावादी आन्दोलनका घाइतेसँग सांसद शर्माको केएमसीले लियो पैसा, सरकारले तिरिदिन्छु भनेको थियो

काठमाडौं– सिनामंगलस्थित काठमाडौं मेडिकल कलेज (केएमसी)ले राजावादी आन्दोलनका घाइतेसँग सरकारको निर्णयविपरित रकम असुलेको छ।
शुक्रबार घर जानका लागि तयार भएका घाइतेलाई अस्पतालले पैसा नतिरी जान नै दिएन। 

केएमसीबाट डिस्चार्ज हुने तयार गरिएका घाइते कुमारजङ्ग रानाको २१ हजार आठ सय ४६, बिशाल निरौलाको १८ हजार र विकास गौतमको १४ हजार दुईसय दुई र आशिष बोहोराको नाममा १८ हजार बिल आयो।

डिस्चार्ज हुने तयारी भएको घाइतेहरूले अस्पताल प्रशासनदेखि भेट्न पुगेकाहरूलाई फैसा छुटका लागि फोन गरे पनि नतिरी जान नमिल्ने उत्तर पाए। 

आन्दोलनमा मलद्वार नजिकै गोली लागेका आशिषका बुवाले १८ हजार जुटाएर केएमसी अस्पतालमा बुझाउँदै छोरालाई डिस्चार्ज गरेर लिएर हिँडे।

त्यस्तै, खुट्टा र कम्मरमा गोली लागेको घाइते कुमारजङ्गकी श्रीमतीले आफन्तबाट पैसा जुटाएर अस्पतालमा तिरिन्। त्यसपछि मात्र कुमार डिस्चार्ज भए।

पैसा तिरेको केही घण्टापछि अस्पतालबाट डिस्चार्ज भएर बाहिरिँदा अस्पतालको गेटमा आन्दोलनमा घाइते भएकाहरूको लागि भनेर सूचना टाँसेको थाहा पाएका थिए।

मन्त्रिपरिषदको बैठकले आन्दोलनमा घाइतेको रकम नलिने निर्णय गरेको थियो। मन्त्रिपरिषद्ले निर्णय गरेर राजपत्रमा प्रकाशित गरिसकेको अवस्थामा केएमसीले भने घाइतेहरूसँग उपचार बापतको पैसा लिएको छ। प्रदर्शनमा घाइते भएकाहरूलाई पैसा नतिरी अस्पतालले डिस्चार्ज नगरेको भेटियो।

केएमसी नेपाली कांग्रेसका सांसद सुनिल शर्मा सञ्चालक रहेको मेडिकल कलेज हो। यसअघि पाठ्यक्रममै नभएको स्वास्थ्य शिविर कार्यक्रममा आवासीय चिकित्सकलाई अत्यधिक खटाएकोबारे विरोध गर्दा डा. विशद दाहाललाई केएमसीले निलम्बन गरेको थियो।

सांसद शर्माले भने सरकारले निर्णय गर्नुअघि नै निशुल्क उपचार गरिदिएको भनी प्रचारबाजी गराएका थिए। तर, रकम असुल नगरी भने बिरामीलाई जान दिइएन।