त्रिभुज आकारमा जनमत–नाउपा एकताको खाकाः सीके अध्यक्ष, रन्जिता सह–अध्यक्ष!

काठमाडौं– तराई र मधेसको मुख्य दल बन्नेगरी जनमत र नागरिक उन्मुक्ति पार्टीको एकता त्रिभुज आकारमा गर्ने तयारी भएको छ।

मुख्य पद त्रिभुज आकारमा तयार पार्नेगरी कार्यदलको बैठक बर्दियामा बसेको छ।

जनमत पार्टीका अध्यक्ष सीके राउतसहितका प्रतिनिधि बर्दिया पुगेका छन्।

पार्टीमा त्रिभुज आकारमा एकीकरणका लागि मुख्य पद प्रस्तावित छन्। जसमा नाउपाका संरक्षक एकीकरणपछि संरक्षक नै रहने र अध्यक्ष सीके राउतलाई कायम गरी सह–अध्यक्ष रन्जिता श्रेष्ठलाई बनाउने तयारी छ।

एक नेताका अनुसार त्यसरी नहुने भए संरक्षक नराखी सल्लाहकार राखी दुई अध्यक्षात्मक प्रणालीका विषयमा पनि प्रस्ताव हुन सक्छ।

जनमतले एकताका लागि अब्दुल खानको नेतृत्वमा शरद सिंह यादव, बालगोविन्द चौधरी सदस्य रहेको कार्यदल बनाएको छ।

नाउपाले पनि प्रतिनिध सभाका सांसद गंगा चौधरी, सुनिता चौधरी रामलाल डगोरा थारू रहेको एकता कार्यदल गठन गरेको छ।

चैत १० गते कार्यदलको बैठक बसेर छलफल सुरू गरेको थियो।

नाउपाले वैशाख ३ गते कैलालीको टीकापुरमा केन्द्रीय समिति बैठक बोलाएको छ। त्यो बैठकमा कार्यदलले तयार पारेको एकता प्रस्ताव अनुमोदन गर्ने तयारी रहे पनि त्यसअघि नै दुवै पार्टीले एकतालाई अन्तिमरूप दिन लागेका हुन्।

जनमत र नाउपा एकता भए संघीय सांसदमा नेकपा (एकीकृत समाजवादी) सरह उनीहरूका सांसद हुनेछन्। यद्यपि एकीकृत समाजवादी समानुपातिकमा तीन प्रतिशतको थ्रेस होल्ड पूरा गर्न नसकेकाले राष्ट्रिय पार्टी बन्न सकेन।

प्रतिनिधि सभामा जनमतका ६ सांसद र नाउपाका ४ सांसद छन्। जनमतले मधेस सरकारको नेतृत्व गरिरहेको छ। सतिशकुमार सिंह मुख्यमन्त्री छन्।

मधेसमा जनमतको १३ र नाउपाको एक सांसद छन्। सुदूरपश्चिम प्रदेशमा नाउपाका ७ सांसद छन्। लुम्बिनीमा नाउपाको ४ र जनमतको ३ सांसद छन्।