पूर्पक्षका लागि जेल गएका दुई पूर्वगृहमन्त्री लामिछाने र महरा, ओलीसँग अचम्मका संयोग छन्

काठमाडौं– नेकपा एमालेका अध्यक्ष केपी शर्मा ओली प्रधानमन्त्री बनेका बेला पूर्पक्षका लागि जेल जाने दुई पूर्वगृहमन्त्री बनेका छन् रास्वपा सभापति रवि लामिछाने र माओवादी उपाध्यक्ष कृष्णबहादुर महरा। 

लामिछाने सहकारी ठगी प्रकरणमा सुप्रिम सहकारीको मुद्दामा पूर्पक्षका लागि सोमबार थुनामा गएका छन्। 

लामिछानेमाथि गोर्खा मिडियामा सहकारीको रकम संगठीत अपराधमा ठगी गरी रकम लगेको अभियोग छ। 

जिल्ला अदालत कास्की, रुपन्देही, काठमाडौं र चितवनलगायतमा लामिछानेविरुद्ध मुद्दा कायम छन्।

उनलाई कास्कीले ६५, काठमाडौंले ६० र रुपन्देहीले एक करोड धरौटीमा रिहा गरेको थियो। तर, उच्च अदालत रुपन्देहीले भने पूर्पक्षका लागि थुनामा पठाउन आदेश गरेपछि शुक्रबार पक्राउ गरिएको थियो।

शनिबार र आइतबार विदा परेका कारण जिल्ला प्रहरी कार्यालय रुपन्देहीको हिरासतमा राखिएका लामिछानेलाई सोमबार जिल्ला अदालतमा उपस्थित गराई थुनामा पठाइएको हो। 

जिल्ला अदालत रुपन्देहीमा उपस्थित गराएर लामिछानेलाई भैरहवास्थित जेलमा पठाइएको छ।

उता, महरा बाहलवाला सभामुख भएका बेला नै २०७६ साल कात्तिक १२ गते महरा पूर्पक्षका लागि जेल चलान भएका थिए। उनी तीन महिनासम्म जेलमा बस्नु परेको थियो। 

कस्तो संयोग भने लामिछानेलाई दुई पटक गृहमन्त्री बनाउने भूमिकामा पनि ओली नै प्रधान थिए भने महरालाई सभामुख बनाएका थिए। 

महराले गृह मन्त्रालय पनि हाँकिसकेका थिए। 

कारण थियो, संसद् सचिवालयकी महिला कर्मचारी रोशनी शाहीमाथि बलात्कार प्रयास।

जिल्ला अदालत काठमाडौंका न्यायाधीश सुदर्शनराज पाण्डेको इजलाशले महरालाई मुद्दाको अन्तिम सुनुवाइ नसकिएसम्मका लागि थुनामा राख्न आदेश दिएको थियो।

बन्द इजलाशमा भएको थुनछेक बहसमा महराका वकिलहरूले बहस गरेका थिए। महराका तर्फबाट वरिष्ठ अधिवक्ता तथा अधिवक्ताहरू रमनकुमार श्रेष्ठ, शेरबहादुर केसी, लवप्रसाद मैनाली, भोजराज आचार्य, सविता भण्डारी र कृष्णप्रसाद सापकोटाले बहस गरेका थिए।

बहसमा पीडित भनिएकी रोशनी शाही पनि उपस्थित थिइन्। महराले आफूमाथि बलात्कार प्रयास गरेको भन्ने उजुरी प्रहरीमा आफैंले दिएको कुरा उनले बहसका क्रममा बताएकी थिइन्।

थुनछेक बहसको केही बेरमै अदालतले महरालाई थुनामा राख्न आदेश दिएको हो। 

सभामुखको पदमा आसिन यी प्रतिवादीले आफ्नो पदको दुरूपयोग गरी असोज १२ गते सरकारले उपलब्ध गराएका वरिष्ठ जिम्मेवार सुरक्षाकर्मीहरूलाई निवासबाट बाहिरिँदा सो कुराको यकिन जानकारी नदिइ आफ्नो हैसियतको कुनै हेक्का नराखी, राज्य र आमनागरिकमा पर्ने असरलाई ख्याल नगरी सो संवेदनशीलताप्रति वेवास्ता गरी केही सुरक्षाकर्मीमात्र लिएर साँझ मादकपदार्थ (रक्सी) सेवन गरी साथमा मादकपदार्थ लिइ पीडित एक्लै रहेको निज डेरारकोठामा गई निजलाई जबरजस्ती मादकपदार्थ सेवन गर्न कर लगाइरगराइ अनुचित प्रभावमा पारी पीडितलाई जबरजस्ती करणी गर्न खोजेको अवस्थामा पीडितले प्रतिकार गर्दा निजलाई कुटपिट समेत गरी घाइते बनाइ जबरजस्ती करणी उद्योगको कसूर गरेकाले,’ अभियोगपत्रमा भनिएको थियो, ‘सम्माननीय सभामुखको गरिमामय पदमा आसिन यी प्रतिवादीले आफ्नो पदको दुरूपयोग गरी मुलुकी अपराध संहिता २०७४को दफा २१९ को उपदफा १ र २ र सोही संहिताको दफा ३४ बमोजिम जबरजस्ती करणी उद्योगको कसूर प्रमाणित हुन आयो।’

अभियोगपत्रमा सभामुखको हैसियतमा रहेका व्यक्तिले कसूर गर्दा कसूरको गम्भीरता बढेको पनि उल्लेख छ।

‘मुलुकी अपराध संहिता २०७४ को दफा ३८ को देहाय (घ) बमोजिम कसूरको गम्भीरता बढाउने अवस्थाको भएको’ भन्दै जबरजस्ती करणी उद्योगमा हुने सजायको डेढी सजाय हुने माग दाबी सरकारी वकिलको छ।

सभामुख भएको अवस्थामा महरा नूरसुल्तानमा सम्पन्न युरेसियन मुलुकका सभामुखको बैठकमा भाग लिन ४ असोजमा कजाकस्तान गएका थिए।

त्यहाँबाट चीनको बेइजिङ हुँदै उनी ११ असोजमा काठमाडौं फर्किए। त्यसको भोलिपल्ट अर्थात् १२ असोजको राति उनी संसद् सचिवालयकी कर्मचारी रोशनीको तीनकुनेस्थित डेरामा गए। यो कुरा महराले पनि स्वीकार गरेका छन्।

आरोपअनुसार त्यो दिन राति महराले डेरामा पसेर रोशनीलाई रक्सी खुवाएको र बलात्कार प्रयासपछि कुटपिट गरेका थिए।