काठमाडौँको प्रदुषण मंगलबार बिहान पनि उच्च, अझै अति अस्वस्थ तहमा

काठमाडौँ - काठमाडौँ उपत्यकामा प्रदुषण मंगलबार बिहान पनि उच्च रहेको छ । मौसम पूर्वानुमान महाशाखाले स्थानीय वायुको प्रभाव र पश्चिमी न्यून चापीय प्रणालीको प्रभावका कारण वर्षा हुन नसकेको जनाएको छ भने प्रदुषण बढेर काठमाडौँ विश्वकै प्रदुषित शहरको सूचीमा शिर्ष स्थानमा रहेको छ ।

‘एयर क्वालिटि इन्डेक्स’ को मंगलबार बिहान साढे ७ बजेको लाइभ रिपोर्ट अनुसार काठमाडौँ विश्वको सबै भन्दा प्रदूषित सहरका रूपमा कायम रहेको छ । यो समाचार तयार गरुन्जेल काठमाडौँको वायु प्रदूषण २६२ एक्युआई पुगेको छ । जुन अति अस्वस्थ तह हो ।  काठमाडौँ पछि भारतको नयाँ दिल्ली दोस्रो स्थानमा छन् । दिल्लीको प्रदुषण १७९ एक्युआई पुगेको छ । 

प्रदुषण मापन गर्दा १५० सम्मको एयर क्वालिटी इन्डेक्सलाई सन्तोषजनक मानिन्छ भने २०० सम्मलाई अस्वस्थ र २०१ देखि ३०० सम्म अति अस्वस्थ तथा ३०१ भन्दा माथिलाई आपत्कालीन अवस्था मानिएको छ ।

पछिल्ला एक साता भन्दाबढी समयदेखि काठमाडौँमा प्रदुषण बढेपनि सरकारले यसबाट बच्न ठोस कदम भने नचालेको भन्दै आलोचना भइरहेको छ । यसको जिम्मेवार निकाय वातावारण विभाग र विपद प्राधिकरणले सामान्य विज्ञप्ति मात्र निकालेर जिम्मेवारीबाट पन्छिएको आम गुनासो रहेको छ ।