यू -१९ विश्वकपको एसिया छनोट आजदेखि काठमाडौँमा, नेपालले युएईविरुद्ध खेल्दै

काठमाडौँ - आजदेखि आइसिसी यू-१९ विश्वकपअन्तर्गत एसिया छनोट प्रतियोगिता काठमाडौँमा शुरु हुदै छ । 

नेपालले नै आयोजना गर्ने एशिया छनौट आजदेखि अप्रिल २१ सम्म काठमाडौँमा हुदै छ । एसिया छनोटमा आयोजक नेपालसहित पाँच टोलीले भाग लिँदैछन्। जसमा नेपाल, अफगानिस्तान, युएई, हङकङ र ओमान रहेका छन् ।

नेपाल, अफगानिस्तान र युएईले सिधा छनोट खेल्दैछन् भने हङकङ र ओमानले प्लेअफबाट छनोट खेल्न आएका हुन् ।

आज दुई खेल हुदै छन् । आज नेपालले युएईसँग खेल्दै छ भने अर्को खेलमा अफगानिस्तान र ओमान खेल्दै छन् । त्यस्तै अप्रिल १४ मा नेपालले ओमानसँग र अफगानिस्तानले हङकङसंग खेल्ने छ । त्यस्तै अप्रिल १६ मा नेपालले हङकङसँग र अफगानिस्तानले युएईसंग खेल्ने तालिका रहेको छ ।

त्यसैगरी अप्रिल १७ मा ओमान र युएई खेल्दै छन् भने अप्रिल १८ मा हङकङ र ओमान खेल्दै छन् । त्यसैगरी अप्रिल १९ मा नेपाल र अफगानिस्तानसँग खेल्दैछन् ।

एशिया छनोटको विजेताले सन् २०२६ मा जिम्बावे र नामिबियामा हुने आइसिसी यू-१९ विश्वकपमा छनोट हुनेछ । यो एकदिवसीय फर्म्याटको विश्वकप हो । 

यू-१९ विश्वकपको एशिया छनौट खेल्ने नेपाली टिममा नरेन भट्ट (कप्तान), अभिषेक तिवारी (उप-कप्तान), निरजकुमार यादव, साहिल पटेल, सिव्रिन श्रेष्ठ, रोशन कुमार विश्वकर्मा, दर्श सोनार, दिलसाद अली, सन्तोष यादव, अशोक धामी, दयानन्द मण्डल, अप्राजित पौडेल, युवराज खत्री र विपिन कुमार शर्मा रहेका छन् । 

नेपालले गत वर्ष दक्षिण अफ्रिकामा भएको विश्वकप खेलेको थियो भने नेपालले अहिलेसम्म आठ पटक युवा विश्वकप खेलिसकेको छ ।