सेनाबाट सशस्त्रमा आएका गौतमको जागिर सकियो, एपीएफमा एक खाली एआईजी नै बन्नेछन् आईजी

काठमाडौं– सशस्त्र प्रहरी बल (एपीएफ)का अतिरिक्त महानिरिक्षक (एआईजी) चन्द्रप्रकाश गौतमको मंगलबार रातीबाट जागिर सकिएको छ। 

उनको सशस्त्र प्रहरी मुख्यालय हलचोकमा मंगलबार विदाईको कार्यक्रम छ। साहित्यीक नाम सीपी रहेका उनी गीतकार पनि हुन्। 
पछिल्लो समय उनी सीमा सुरक्षा विभागका प्रमुख थिए।

सशस्त्र प्रहरी नियमावलीमा उल्लेख भएको ३० वर्षे सेवा अवधिका कारण उनी मंगलबार राति १२ बजेदेखि अनिवार्य अवकाशमा जान लागेका हुन्। 

२०५२ वैशाख ३ मा उनी नेपाली सेनामा भर्ना भएका थिए। सशस्त्र प्रहरी गठन हुने भएपछि उनी २०५८ सालमा सशस्त्र प्रहरीमा एक तह बढुवासहित स्थानान्तरण भएर आएका थिए।

उनी अवकाशमा जाने भएसँगै एपीएफमा एक एआईजी रिक्त भएको छ। त्यसका लागि केही समय अघि मात्रै डीआईजीको पदावधि थपिएका डीआईजीहरु कमल गिरी, गणेश ठाडामगर, कुलबहादुर नेम्वाङ र शम्भु सुवेदी प्रतिस्पर्धामा छन्। 

उनीहरुसँगै सि. सं १ का टोलीहरु पनि एआईजीको प्रतिस्पर्धामा छन्। रिक्त एक एआईजीमा बढुवा हुने व्यक्ति भावि सशस्त्र प्रहरी प्रमुखको मुख्य दाबेदार हुने भएकाले पनि यो बढुवा निकै पेचिलो हुने देखिन्छ।