नेपाल प्रहरी एआईजी बढुवा सिफारिसः ‘नमस्ते’ टोलीलाई फेरि अन्याय 

काठमाडौं– नेपाल प्रहरी अतिरिक्त महानिरिक्षक बढुवा सूची सार्वजनिक भएसँगै न्याय र अन्यायको पराकाष्ट पनि सतहमा छर्लङ्ग भएको छ।

राष्ट्रिय अनुसन्धानबाट स्थानान्तरण भएर नेपाल प्रहरीमा आएको टोली अतिरिक्त महानिरीक्षक (एआईजी) बढुवामा छुटेको छ जसलाई संगठनमा हेपेर ‘नमस्ते’ टोली समेत भनिन्छ। 

एक अधिकारी भन्छन्,‘हामी प्रहरी कर्मचारीका रुपमा सबै तालिमदेखि अब्बलतामा पनि खारिएका छौं तर किन यस्तो हुन्छ?’

यो टोलीबाट सिद्धिबिक्रम शाह, सुशील सिंह राठौर, उमा चतुर्वेदी, हिमालयकुमार श्रेष्ठलगायत बढुवाको प्रतिस्पर्धामा थिए। 

तत्कालिन गृहमन्त्री समेत रहेका रास्वपा सभापति रवि लामिछानेको कार्यकालमा प्रहरी नायव महानिरिक्षक (डीआईजी) बढुवामा पनि अन्याय भएको थियो। 

तर सत्ता परिवर्तन हुनासाथ बढुवामा समेटिएपछि राहत भएकोसम्म मानेकालाई एआईजी बढुवामा हेपिएको प्रतीत हुनेगरी सिफारिसको सूची सतहमा आएको छ।

बालुवाटारले २०५४ सालमा भर्ना भएका अधिकारी र केसीलाई समेट्ने अडान राखेपछि केही समय बढुवा सिफारिस रोकिएको थियो।

अन्तिममा राष्ट्रिय अनुसन्धान विभागबाट आएको टोली नै बढुवामा छुटेको छ। उनीहरुलाई तत्कालीन कांग्रेस नेता खुमबहादुर खड्का गृहमन्त्री भएका बेला नेपाल प्रहरीमा स्थानन्तरण गराइएको थियो।

‘प्रहरीमा दक्षताका हिसाबले काम गर्न सक्ने टोली किन हेपाईमा पर्छ’, एक जना पूर्वएआईजी भन्छन्,‘त्यसो हो भने सशस्त्र प्रहरी बलमा त सबैबाट आएका छन्। हेप्तै जाने हो त?’

तत्कालीन आईजीपी अच्युतकृष्ण खरेलले राष्ट्रिय अनुसन्धान विभागबाट प्रहरीमा ल्याउने प्रस्ताव सुरुमा अस्वीकार गरेका थिए। 

पछि खरेल हटेर प्रदीपशमशेर जबरा आईजीपी भएका बेला २५ पुस २०५८ मा ३० इन्स्पेक्टरसहित ४६ जनालाई नेपाल प्रहरीमा स्थान्तरण गरिएको थियो।

राअविबाट आएकाहरुमा पनि केही यस्ता व्यावसायिक अफिसरहरू छन्, जसले दुई दशकभन्दा बढी समय व्यावसायिक काम गर्दा पनि आफूहरूलाई ‘फरक दर्जा’का अधिकृतहरू जस्तो व्यवहार गरिएको भन्दै गुनासो गर्छन्। 

अहिले बढुवा सिफारिसमा परेकामध्ये पहिलो नम्बरमा चन्द्रकुवेर खापुङ, दोस्रोमा लालमणि आचार्य र तेस्रोमा कृष्णहरि शर्मा पोखरेल छन्।