गण्डकी हिरोजले जित्यो केपी ओली कप क्रिकेटको उपाधि

काठमाडौँ- दोस्रो संस्करणको केपी ओली कप टी-२० राष्ट्रिय पुरुष क्रिकेटको उपाधि गण्डकी हिरोजले जितेको छ । 

मदन भण्डारी स्पोट्र्स एकेडेमीको आयोजनामा पोखरा रंगशालास्थित क्रिकेट मैदानमा शुक्रबार भएको फाइनल खेलमा सिइसी काठमाडौँलाई ५ विकेटले हराउँदै गण्डकी हिरोजले उपाधि जितेको हो । 

उपाधि जितेको गण्डकीले १० लाखसहित ट्रफी हार पार्‍यो । फाइनलमा पराजित भएको काठमाडौँले ५ लाखमा चित्त बुझायो ।

काठमाडौँले दिएको १ सय ८३ रनको लक्ष्य पाएको गण्डकीले १७ ओभर ३ बलमा ५ विकेट गुमाउँदै १८५ रन बनायो । गण्डकीका वसन्त कार्की २७ र नारायण जोशी १३ रनमा अविजित रहँदै टोलीलाई जित दिलाए ।

किरण ठगुन्नाले ५२ रनको उत्कृष्ट अर्धशतकीय पारी खेल्दै आउट भए । सुजन थपलिया ३५ रनमा आउट भए । दिपक डुम्रे २६ रनमा आउट भए । ओपनर साकिव हुकले २४ रन बनाए । बलिङमा काठमाडौँका लागि दिपेन्द्र रावतले ३ विकेट लिँदा मनोज यादव र सूर्य तामाङले १-१ विकेट लिए ।

त्यसअघि टस जितेर ब्याटिङ थालेको काठमाडौँले १९ ओभर ४ बलमा १८२ रनमा समेटिएको थियो । अर्जुन घर्तीले ६८ रनको उत्कृष्ट पारी खेल्दै क्याचआउट हुन पुगे । यस्तै पृथु बास्कोटाले अर्धशतकीय पारि खेल्दै आउट भए । सिवम तिवारीले २३ रन जोड्नु बाहेक अन्य ब्याटरले दोहोरो अंक जोड्न सकेनन् ।

गण्डकीका लागि अमृत गुरुङ र कृष्ण पौडेलले समान ३-३ विकेट लिए भने विपिन खत्री र मिलन बोहोराले २–२ विकेट लिए । गण्डकी हिरोजका किरण ठगुन्ना प्लेयर दी म्याच घोषित भए ।

यस्तै काठमाडौँका दिपेन्द्र रावत प्लेयर अफ दी टुर्नामेन्ट घोषित भए । उनले ३० हजार रुपैयाँ प्राप्त गरे । उत्कृष्ट ब्याटर अत्तरियाका विपिन रावल र उत्कृष्ट बलर लुम्बिनीका अजय कुमार चौहान घोषित हुँदै समान २०–२० हजार रुपैयाँ प्राप्त गरेका छन् ।