गगन थापाले भने- गनगन गर्ने होइन, काँग्रेसले समाधान दिनुपर्छ
काठमाडौँ- नेपाली काँग्रेसका महामन्त्री गगन थापाले नेपाली काँग्रेसले समाधान दिने गरी काम गर्नुपर्ने बताएका छन् ।
शुक्रबार नेपाल लोकतान्त्रिक वैदेशिक रोजगार व्यवसायी एसोसिएसनले काठमाडौँमा आयोजना गरेको एक कार्यक्रममा बोल्दै थापाले काँग्रेसलाई समस्या मात्र देखाउने छुट नरहेको बताएका हुन् ।
‘काँग्रेस पार्टीले अब समस्या मात्र देखाएर हुँदैन, अब समाधान पनि दिनुपर्छ । हामी समाधान दिने पार्टी हो । हाम्रो ड्युटी हो यो,’ उनले भने, ‘नेपाली काँग्रेस पार्टीले नेपालमा रोजगारीको समस्या छ समाधान दिने हो ।’
उनले वैदेशिक रोजगारीको क्षेत्रलाई थप राम्रो बनाउनुपर्ने भन्दै काँग्रेसले यसमा काम गरिरहेको बताए । ‘अब पार्टीको काम गर्ने तरिका र दृष्टिकोण पनि बदलिनुपर्छ,’ उनले भने ।
महामन्त्री थापाले अगाडि थपे, ‘अब हामीले गनगन गर्ने पनि होइन रुवाबासी गर्ने पनि होइन । अब समस्या भएको क्षेत्रमा काँग्रेस छ र समाधान दिन्छ भन्ने पार्टी बनाएर जान आवश्यक छ ।’
वैदेशिक रोजगारीको क्षेत्रमा देखिएका समस्या समाधान गर्नको लागि ‘मिसन रोजगारी’ राष्ट्रिय अभियान सुरु गरिएको उनले जानकारी दिए ।
उनले वैदेशिक रोजगारीमा देखिएका समस्याहरूको समाधान गर्नको लागि पार्टीका अर्का महामन्त्री विश्वप्रकाश शर्मासँग मिलेर उक्त अभियान सञ्चालन गरेको दाबी गरे ।
वैदेशिक रोजगारीको क्षेत्रलाई तिरस्कार र गालीको क्षेत्र बनाउन नहुने महामन्त्री थापाको धारणा थियो ।
‘अहिले नेपाली काँग्रेसको दुई जना महामन्त्रीले मिसन रोजगारी भन्ने एउटा राष्ट्रिय अभियान प्रारम्भ गरेका छौँ । त्यो अभियानको एउटा अभिन्न अंग भनेको एउटा वैदेशिक रोजगारी हो’ उनले भने, ‘यो अभियान शुरु भएको एक महिना भयो । यसमा हाम्रो एउटा टिमले काम गरिरहेको छ ।’
यो अभियानले केही विश्वविद्यालयहरूसँग साझेदारी गरिरहेको जानकारी दिँदै उनले भने, ‘केही शैक्षिक संस्थाहरूसँग पनि हाम्रो साझेदारी छ । हामी अब एसशेसिएशनसँग पनि काम गर्न चाहन्छौँ ।’
उनले थपे, ‘हामी वैदेशिक रोजगारीको क्षेत्रलाई तिरस्कारको क्षेत्र, गालीको क्षेत्र होइन हामी सँगसँगै बसेर कस्ता मान्छे काम गर्न गएका छन् ? किन गएका छन् रु को जाने को नजाने भन्नेबारेमा ज्ञान उत्पादन गर्ने ठाउँमा हामी तपाईंहरुसँग बसेर काम गर्न चाहन्छौँ । किनकि यो विषयको हल हामीले खोज्नुपर्नेछ ।’
काँग्रेसले नेपालमा रहेको रोजगारीको समस्याको समाधान दिन सक्नुपर्ने भन्दै निजी क्षेत्रसँग सहकार्य गर्न तयार हुनुपर्नेमा उनले जोड दिए ।
राप्रपाले भोलि बिजुलीबजारमा प्रदर्शन गर्ने, निषेधित क्षेत्र तोड्ने तयारी
धमिलो पानीमा माछा मार्ने दुस्साहस सफल हुँदैन : प्रचण्ड
प्रमुख तीन दलका शीर्ष नेताहरू छलफलमा
‘गणतन्त्रवादी शक्ति एक हुनुपर्ने बेला आएको छ’
प्रधानमन्त्री र सभामुखसँगको वार्तापछि पनि शिक्षकले छाडेनन् सडक (तस्वीरहरू)
ताप्लेजुङ घटनापछि योगेश भट्टराईको आग्रह– विवेकले काम गरौँ, प्रायोजकहरूको हतियार नबनौँ
