राजावादीको आन्दोलनमा भएको क्षतिमा बीमा दाबी ४ करोड ५९ लाख, भुक्तानी ३३ लाख रूपैयाँ

काठमाडौं- राजावादीको आन्दोलनमा भएको भौतिक क्षतिमा ४ करोड ५९ लाख रूपैयाँको बीमा दाबी परेकामा इन्स्योरेन्स कम्पनीले ३३ लाख ३५ हजार रुपैयाँ भुक्तानी गरेका छन्।

नेपाल बीमा प्राधिकरणका अनुसार हुलदंगाको कारणले भएको क्षतिबापत १२ वटा निर्जीवन बीमा कम्पनीमा ५० वटा वास्तविक दाबी परेकामा इन्स्योरेन्स कम्पनीले १३ वटाको भुक्तानी गरेका हुन्। यो वैशाख ३ गतेसम्मको तथ्यांक हो।

राष्ट्रिय बीमा कम्पनीमा सबैभन्दा बढी १ करोड २७ लाख रूपैयाँको दाबी परेको छ। यस्तै सिद्धार्थ प्रिमियर इन्स्योरेन्समा ७६ लाख रूपैयाँको दाबी परेको छ।

सम्पत्ति बीमातर्फ सर्वाधिक २ करोड ७८ लाख रूपैयाँ दाबी परेकामा कम्पनीहरुले ३२ लाख ४२ हजार रुपैयाँ भुक्तानी गरेका छन्। निजी मोटर बीमातर्फ १ करोड ६ लाख दाबी परेकामा ९२ हजार रुपैयाँ भुक्तानी भएको प्राधिकरणले जनाएको छ।

यस्तै, इन्जिनियरिङ तथा ठेकेदार जोखिमतर्फ ३७ लाख रूपैयाँ दाबी परेको छ। राजावादीहरूले चैत १५ गते काठमाडौंमा प्रदर्शनका क्रममा निजी घर, सरकारी भवन र गाडीमा तोडफोडका साथै आगजनी गरेका थिए।