छिटो युद्ध विराम नभए रुस-युक्रेन मध्यस्थताबाट पछि हट्ने ट्रम्पको चेतावनी

काठमाडौँ - अमेरिकी राष्ट्रपति डोनाल्ड ट्रम्पले रुस र युक्रेनले शान्ति सम्झौतामा पुग्न गाह्रो बनाएमा अमेरिका थप वार्ताको मध्यस्थताबाट पछि हट्ने चेतावनी दिएका छन् ।

मिडियासँग कुरा गर्दै ट्रम्पले आफुले यसै दिनमा युद्धविरामको अपेक्षा नगरेको तर यो सकेसम्म चाँडो होस् भन्ने चाहेको बताउदै यस्तो चेतावनी दिएका हुन् ।

अमेरिकी विदेशमन्त्री मार्को रुबियोले छिटो युद्धविराम नभए अमेरिका मध्यस्थताबाट बाहिरिने चेतावनी दिएको केहि घण्टापछि ट्रम्पले पनि सोहि कुरा दोहोराएका हुन् । रुबियोले भनेका थिए - 'यदि युद्धविराम सम्झौताको कुनै स्पष्ट संकेत देखिएन भने, अमेरिकाले केही दिन भित्र रुस-युक्रेन शान्ति सम्झौताको मध्यस्थता गर्ने आफ्नो प्रयास त्याग्नेछ ।'

रुस र युक्रेनबीचको सम्झौताको बारेमा ट्रम्पलाई प्रश्न गर्दा उनले भने, 'यहाँ हामी मरिरहेका मानिसहरूको बारेमा कुरा गर्दैछौं । आदर्श रूपमा, हामी यसलाई रोक्ने छौं । अब यदि कुनै कारणले गर्दा दुवै पक्ष मध्ये एकले धेरै गाह्रो बनायो भने हामी तिमीलाई मूर्ख, मूर्ख र भयानक मान्छे भन्नेछौं र हामी पछि हट्नेछौं ।

ट्रम्पको यो बयान यस्तो समयमा आएको छ जब हालै युक्रेनी राष्ट्रपति भोलोडिमिर जेलेन्स्कीले अमेरिकी विशेष दूत स्टिभ विटकफलाई रूसको पक्ष लिएको आरोप लगाएका थिए ।