ममता काफ्ले हत्या प्रकरणको मुद्दामा फेरि सुनुवाई, अब के–के हुनेवाला छ?

काठमाडौं– अमेरिकामा पत्नी ममता काफ्लेको पासबिक हत्या गरी शव लुकाएको अभियोगमा पक्राउ गरी पूर्पक्षका लागि थुनामा रहेका पति नरेश भट्टलाई फेरि अदालतमा उपस्थित गराएर थप सुनुवाई हुने भएको छ। 

अब चार दिनपछि भट्टलाई अदालतमा उपस्थित गराएर यस प्रकरणका थप प्रमाणसहित साबिती बयानका लागि साक्षीलाई पनि उपस्थित गराउने तयारी भएको हो।

२५ तारिकका दिन प्रिन्स विलियम काउन्टीको अदालतमा उपस्थित गराई बयान गराइने बताइएको छ।

यस प्रकरणबारे चर्चा चलाएकी अमेरिकास्थित पत्रकार पत्रकार सच्चि मैनालीलगायत ममताका परिवारका सदस्य पनि बयानका लागि हाजिर हुन सक्ने अनुमान गरिएको छ।

यस घटनालाई सुरुदेखि अध्ययन गरिरहेका पत्रकार गुणराज लुइँटेल (लुईँटेलजी)का अनुसार बयानका क्रममा ममताका आमा दाजु पनि हुन सक्ने भनिए पनि आधिकारिक पुष्टि गरिएको छैन।

के हो यो प्रकरण?

अमेरिकाको भर्जिनियाबाट सम्पर्कविहीन भएकी ममता काफ्लेको हत्या श्रीमान नरेश भट्टले नै गरेको प्रहरीले निष्कर्ष निकालेको थियो।

गत बर्षको जुलाईदेखि बेपत्ता काफ्लेको हत्या भएको निष्कर्ष निकाल्दै प्रहरीले नरेशविरुद्ध पत्नीको हत्या गरेर शव लुकाएको मुद्दा चलाइएको थियो। 

मानसास पार्कका प्रहरी प्रमुख मारियो लुगोले स्थानीय समय अनुसार पत्रकार सम्मेलन गर्दै ममताको घरमा भेटिएको डीनएन रिपोर्ट सार्वजनिक गरेका थिए।

उनका अनुसार भट्टको सुत्ने कोठामा भेटिएको रगत ममताको नै भएको र गत बर्षको जुलाई २९ मा नै उनको हत्या भएको प्रमाण पाइएको खुलेको पत्रकार सम्मेलनमा बताइएको थियो। 

यसअघि अदालतमा पेस गरिएको तस्वीरमा कोठाभित्रको कार्पेट र बाथरुममा रगतका टाटा देखिएका थिए। नरेश भूतपूर्व अमेरिकी सैनिक हुन्। 

कसरी भयो नरेश–ममता सम्बन्ध र बिहे?

कञ्चनपुरको बेल्डाँडी गाउँपालिका वडा नम्बर २ घर भएका नरेश भट्ट ९ वर्ष अघिसम्म नेपालमै थिए। छिमेकी जिल्ला कैलालीको सदरमुकाम धनगढीमा उनी चिकित्सा प्रतिनिधि (एम.आर.) को रुपमा काम गर्दै आएका थिए।

धनगढीकै सेती प्रादेशिक अस्पताल लाइनमा रहेका दुई मेडिकलमा उनको लगानी पनि थियो। नरेशका एक जना परिवारका सदस्यका अनुसार धनगढीमा व्यापार व्यवसाय रामै्र चलेको थियो। तर, उनी ०७३ साल साउन १४ मा अमेरिकाका लागि उडे।

यूएस आर्मीमा भर्ती हुने उद्देश्यसहित अमेरिका पुगेका नरेशलाई आफ्नो उद्येश्य पूरा गर्न धेरै समय लागेन। अमेरिका पुगेको एक वर्षपछि ०७४ साल असारमा उनी यूएस आर्मीमा भर्ती भए। त्यसको जानकारी उनले सामाजिक सञ्चाल फेसबुकमार्फत दिएका थिए।

यूएस आर्मीमा भर्ती भएका नरेश बेलाबेला नेपाल आइराख्थे। ६ वर्षअघि अमेरिका बसाइकै क्रममा काभ्रेको पनौती घर भएकी ममता काफ्लेसँग भट्टको सामाजिक सञ्जालमार्फत चिनजान भएको थियो। सामाजिक सञ्जालबाटै दुईबीच प्रेम सम्बन्ध बढ्यो। 

०७७ साल मंसिर २५ मा नरेश र ममताको विवाह भयो। विवाहको ८ महिनापछि ०७८ साल साउन १० मा ममता पनि अमेरिकाका लागि उडिन्। झण्डै एक वर्षअघि उनले छोरीलाई जन्म दिइन्। प्रेम सम्बन्धलाई विवाहमा परिणत गरेकी ममता साउन १६ (जुलाई ३१) देखि बेपत्ता भएकी थिइन्।