उद्घाटनस्थलमै नपुगी फर्किए नेपाल र भारतका मन्त्री, जिल्लिए स्वागतमा बसेका तीन जिल्लाका कर्मचारी

काठमाडौं- भारतका विद्युत्, आवास तथा शहरी मामिला मन्त्री मनोहरलाल खट्टर र ऊर्जामन्त्री दीपक खड्का मंगलबार संखुवासभा पुग्ने भएपछि स्वागतका लागि विशेष तामझाम गरियो ।

बिहानैदेखि नेपाल विद्युत् प्राधिकरणका कर्मचारी खटाएर एउटा २२० केभी प्रसारण लाइन र तीनवटा सब-स्टेशन उद्घाटन गर्ने भनेर ऊर्जामन्त्री खड्काले गृहजिल्लामा विशेष निर्देशन जारी गरिसकेका थिए ।

त्यहीअनुसार संखुवासभाको तुम्लिङटारस्थित उद्घानस्थलमा कार्यक्रम मञ्चदेखि स्वागतद्वार र तुल ब्यानर पनि टाँगिएको थियो ।

तर भयो के भने नेपाल र भारतका दुवै मन्त्री सवार हेलिकप्टर अरूण तेस्रो जलविद्युत् आयोजनाको पावर हाउस र बाँध क्षेत्रमा गएर बस्यो ।

सुरुमा सब-स्टेशन र प्रसारण लाइन उद्घाटन गर्न भनेर स्वागतका लागि तम्तयार भोजपुर, संखुवासभा र तेह्रथुमबाट समेत बोलाइएका सुरक्षा अधिकारीदेखि कर्मचारीसमेत नराम्ररी जिल्लिएका छन् ।

प्राधिकरणका पूर्वाधार उद्घाटनका लागि गरिएको तामझामपूर्ण तयारी दुवै मन्त्री सिधै अरुणको बाँधस्थल पुगेर काठमाडौं फर्किएपछि बालुवामा पानी जस्तै भएको छ ।

भारतको सहयोगमा निर्माण भएको कोशी कोरिडोर २ सय २० केभी प्रसारण लाइनअन्तर्गत् इनरुवा वसन्तपुर–बानेश्वर–तुम्लिङटार प्रसारण लाइनको उद्घाटन पनि हुन सकेन ।

त्यसैगरी संखुवासभाको तुम्लिङटार सबस्टेशन, बानेश्वर सबस्टेशन र वसन्तपुर सबस्टेशनको संयक्त रूपमा उद्घाटन गर्ने कार्यक्रम पनि अलपत्र परेको छ । अर्थात् यी चार परियोजना उद्घाटन नै नगरी मन्त्रीहरू काठमाडौं गएका छन् ।

मन्त्रीहरू अरुणको बाँधस्थलबाटै हिँडेपछि तुम्लिङटार क्षेत्रमा रातारात बनाइएका गेट अलपत्र परेका छन् । ऊर्जा, जलस्रोत तथा सिँचाइ मन्त्री खड्काको निमन्त्रणामा भारतीय मन्त्री खट्टर २ दिने भ्रमणमा आएका हुन् ।

खट्टर र खड्काले भारतीय लगानीमा निर्माणाधीन अरुण तेस्रो जलविद्युत् आयोजनाको पावर हाउस तथा बाँध क्षेत्रको अवलोकन गरेर काठमाडौं आइसकेका छन् ।