स्वास्थ्य मन्त्री र चिकित्सक प्रतिनिधिबीच वार्ता जारी

काठमाडौं- आवासीय चिकित्सकहरुका मागका विषयलाई लिएर स्वास्थ्य मन्त्री प्रदीप पौडेल र चिकित्सक प्रतिनिधिबीच वार्ता चलिरहेको छ ।

सडकमा उत्रेका चिकित्सकहरुसँग स्वास्थ्य तथा जनसंख्या मन्त्रालयमा वार्ता जारी रहेको छ। स्वास्थ्य मन्त्रालय घेर्न माइतीघरमा उत्रेका नेपाल चिकित्सक संघका पदाधिकारी, आवासयी चिकित्सकहरु र अन्य चिकित्सकका प्रतिनिधिहरु स्वास्थ्य मन्त्रालयको हलमा छलफलमा रहेका छन् ।

स्वास्थ्य मन्त्री पौडेलले चिकित्सकहरुलाई छलफलका लागि मन्त्रालयमा बोलाएका थिए । छलफलमा चिकित्सकहरुले आफ्ना विषय राखिरहेका छन्। वार्तामा स्वास्थमन्त्री प्रदीप पौडेल, नेपाल चिकित्सक संघका अध्यक्ष डा. अनिल कार्की, आवासीय चिकित्सकले गठन गरेको स्वास्थ्यकर्मीका लागि सुरक्षित कार्यस्थल संघर्ष समितिका संयोजक शेषराज घिमिरे, कर्णाली स्वास्थ्य विज्ञान प्रतिष्ठानका पूर्वउपकुलपति डा. मंगल रावल लगायत छन् । उनीहरुले शुक्रबार देशभरका अस्पतालमा आकस्मिक बाहेकका सेवा ठप्प पार्ने चेतावनी दिएका छन् ।

निजी मेडिकल कलेजले निर्वाह भत्ता नदिएसम्म नियमित चिकित्सकीय सेवा पूर्णरूपमा बन्द रहने आवासीय चिकित्सक बताउँछन्। चिकित्सा शिक्षा आयोगको २५ माघमा बसेको १६ औं बैठकले आवासीय चिकित्सकलाई सरकारी आठौं तहको तलब सुविधा दिन निजी मेडिकल कलेजलाई निर्देशन दिएको थियो । तर निजी मेडिकल कलेजले निर्देशन अवज्ञा गरेपछि आवासीय चिकित्सकहरुले अझै कडा आन्दोलन थाल्ने चेतावनी दिएका छन् ।