शिक्षकहरूको मागलाई वार्ताबाट समाधान गर्छु- मन्त्री पन्त

काठमाडौँ - नवनियुक्त शिक्षा, विज्ञान तथा प्रविधिमन्त्री रघुजी पन्तले आन्दोलनरत शिक्षकहरूको मागलाई वार्ताबाट समाधान गर्ने प्रतिबद्धता व्यक्त गरेका छन् ।

बिहीबार मन्त्रालयमा पदभार ग्रहण गर्दै मन्त्री पन्तले शिक्षकहरूको मागबारे आफू जानकार रहेको बताउँदै मन्त्रालयका अधिकारीहरूसँग विस्तृत जानकारी लिएर समस्याको समाधान खोज्ने उल्लेख गरेका हुन् । उनले भने- 'भर्खरै मन्त्रालयको जिम्मेवारी सम्हालेको छु। शिक्षकहरूको आन्दोलन र मागबारे जानकार छु। मन्त्रालयले यसअघि गरेका प्रयासप्रति आभार व्यक्त गर्छु। अब विस्तृत जानकारी लिएर वार्ताको माध्यमबाट समाधान खोज्छु ।'

उनले शिक्षकहरूलाई कक्षाकोठामा फर्काउन वार्तालाई प्राथमिकता दिने र बोल्नेभन्दा काममा ध्यान केन्द्रित गर्ने बताए । मन्त्री पन्तले पहिलो निर्णयस्वरूप मन्त्रालयको कार्यविधि तयार गर्न १५ दिने समय सीमासहित समिति गठन गरेका छन् । उनले मन्त्रालयका अधिकारीहरूसँग छलफल गरेर आन्दोलनको समाधानमा अगाडि बढ्ने योजना बनाएका छन् ।

काठमाडौंको माइतीघर–बानेश्वर क्षेत्रमा केन्द्रित शिक्षक आन्दोलन गत चैत २० गतेदेखि २३ दिनदेखि जारी छ । शिक्षकहरूले विद्यालय शिक्षा ऐन जारी गर्नुपर्ने मुख्य माग राख्दै आन्दोलन गरिरहेका छन् । मन्त्री पन्तले मन्त्रालयले यसअघि गरेको पहलको प्रशंसा गर्दै थप प्रभावकारी कदम चाल्ने प्रतिबद्धता जनाएका छन् ।

तत्कालिन शिक्षामन्त्री विद्या भट्टराईले सोमबार पदबाट राजीनामा दिएपछि प्रधानमन्त्री केपी शर्मा ओलीको सिफारिसमा राष्ट्रपति रामचन्द पौडेलले बुधबार पन्तलाई मन्त्रीमा नियुक्त गरेका थिए ।