११ पूर्वआईजी प्रहरी प्रधान कार्यालय पुगे, बाहलवाला आईजी थापासँग किन भेटेछन्?

काठमाडौं– अवकाशप्राप्त प्रहरीका ११ जना पूर्वमहानिरिक्षक (आईजी) शुक्रबार प्रधान कार्यालय पुगेका छन्। निवर्तमान बनेका बसन्तबहादुर कुँवरसहितका आईजीहरु मोतिलाल बोहोराको संयोजकत्वमा त्यहाँ पुगेका थिए। 

उनीहरुको भेटघाटको मुख्य लक्ष्य बर्तमान आईजी दीपक थापालाई बधाई र शुभकामना दिनु रहेको प्रधान कार्यालयले जनाएको छ।

नेपाल प्रहरी पूर्व संगठन प्रमुख मञ्चका संयोजक अवकाश प्राप्त प्रहरी महानिरीक्षक बोहराको प्रमुख आतिथ्यमा अवकाश प्राप्त प्रहरी महानिरीक्षकज्यूहरूबाट प्रहरी महानिरीक्षक दिपक थापाज्यूलाई बधाई तथा शुभकामना कार्यक्रम सम्पन्न भएको प्रधान कार्यालयले जनायो ।  

उक्त कार्यक्रममा बोहराद्वारा थापलाई संगठनको श्रीवृद्धिको लागि उदाहरणीय भूमिका निर्वाह गर्न र संगठनको उन्नति र गौरवको लागि नेपाल पूर्व संगठन प्रमुख मञ्च सदैव रचनात्मक सहयोग गर्न तत्पर रहेको बताए।  

थापाले प्रहरी संगठनको वृहत्तर हित र प्रहरी कर्मचारीहरुको मनोवल उच्च राख्न नीतिगत तथा सेवासुविधाको सन्दर्भमा दृढ संकल्पित रहेको कुरा विश्वास दिलाए।

थापालाई बधाई दिनका लागि बोहोरा र कुँवरसहित अच्युतकृष्ण खरेल, रमेशचन्द ठकुरी, शैलेश थापा क्षत्री, उपेन्द्रकान्त अर्याल, प्रकाश अर्याल, कुवेरसिंह राना, धीरजप्रताप सिंहलगायत पुगेका थिए।