श्रीमानविरुद्ध अरुणिमाले डिभोर्ससँगै अंशमुद्दा पनि हालेको खुलासा

काठमाडौं- अभिनेत्री अरुणिमा लम्सालले श्रीमान युवराज श्रेष्ठविरुद्ध सुनसरी जिल्ला अदालतमा सम्वन्धविच्छेद र अंशमुद्दा हालेको खुलेको छ । उनले सोही अदालतमा विवाह दर्ता गरेकी थिइन् ।

जिल्ला अदालत स्रोतका अनुसार आज सो मुद्दाको सुनवाइका लागि पेशी तोकिएको छ । अरुणिमा भने मुद्दा दायर गरेर अमेरिका फर्किसकेकी छन् । उनले आफ्नो मुद्दामा वारेस तोकेर गएकी थिइन् । अब वारेसमार्फत उनले मुद्दा लड्नेछिन् ।

हालै नेपाल आएका बखत अरुणिमाले विभिन्न अन्तरवार्ताहरूमा श्रीमानसँग कुनै अंशको दावी नगरेको बताएकी थिइन् । तर, उनले दिएको निवेदनमा अंश माग गरिएको पाइएको छ । श्रीमानको सम्पत्तिलाई परिवारमा ६ भाग लगाएर त्यसको एक भागको आधा भाग आफूले पाउनुपर्ने उनले फिरादपत्रमा उल्लेख गरेकी छन् ।

युवराजको परिवारमा बुवा, दुईवटी आमा, एक दाजु र एक भाइ रहेको हुँदा मुल अंश ६ भाग लगाउने प्रस्ताव उनले गरेकी हुन् । युवराजले पाउने एक भागको आधामा उनको दाबी छ ।

वैवाहिक जीवन जति छोटो भए पनि कानूनतः अरुणिमाले श्रीमानको आधा अंशमा दाबी गर्न सक्छिन् । विवाहको दुई दिनपछि नै उनी श्रीमानलाई छोडेर अमेरिका गएकी थिइन् भने त्यसपछि उनीहरुको भेट नै नभई सम्बन्धविच्छेदको मुद्दा अदालत पुगेको छ । विभिन्न अन्तर्वार्तामा अरुणिमाले विवाहपछि श्रीमानसँग एक रात पनि नसुतेको बताएकी थिइन् ।

आफ्नो फिरादपत्रमा अरुणिमाले श्रीमानमाथि विभिन्न आरोपहरू लगाएकी छन् । उनको मुख्य आरोप आफूलाई विहेअघि झूटो कुराहरू बोलेको भन्ने छ । आफूलाई सिँढी बनाएर अमेरिका आउनका लागि मात्रै विवाह गरेको उनले बताएकी छन् ।

अमेरिकामा एकल जीवन बिताइरहँदा गत वर्ष साउन २ गते घुमफिरका लागि नेपाल आएका बखत युवराजसँग भेट भएको र उनीबाट मोहित भएको फिरादपत्रमा अरुणिमाले उल्लेख गरेकी छन् । युवराजले आफूलाई नेपालको प्रतिष्ठित व्यापारी र राजनीतिकर्मीका रूपमा चिनाएको तथा पूर्वप्रधानमन्त्री शेरबहादुर देउवा र पूर्वमन्त्री ज्ञानेन्द्रबहादुर कार्कीसँग विशेष सम्वन्ध रहेको बताएको अरुणिमाको भनाइ छ ।

अरुणिमाका अनुसार युवराजले विहेपछि आफू पनि अमेरिका जाने र त्यहाँ मिलेर व्यापार गर्ने योजना सुनाएका थिए । तर, आफू बिहे गरेर अमेरिका गएपछि श्रीमानले पढाइ, सम्पत्ति र राजनीतिको बारेमा गरेका कुराहरु झूटो ठहरिएको उनले दावी गरेकी छन् ।

अरुणिमाले श्रीमानविरुद्ध सम्बन्धविच्छेद र अंशमुद्दा दायर गरेको जिल्ला अदालत सुनसरीका श्रेस्तेदार टेकेन्द्रजंग राणाले पुष्टि गरे । सो मुद्दा हाल अदालति प्रक्रियामा रहेको उनले जानकारी दिएका छन् ।