कानुनी रुपमा उम्किन दुई महिना बाँकी थियो, ससुराको हत्या अभियुक्तलाई प्रहरीले यसरी समात्यो 

काठमाडौं– हत्या मुद्दाको २० बर्षे हद म्याद सकिन दुई महिना बाँकी रहँदा इलाका प्रहरी कार्यालय तुलसीपुर दाङले एक जना ससुराको हत्या आरोपितलाई कानुनी कारबाहीको दायरामा उभ्याएको छ।

वैशाख १२ गते पक्राउ गरिएका अभियुक्त ३९ बर्षिय बीरबहादुर गुरुङ हुन्। जो लामो समय भारत बसेर ५ बर्षदेखि दाङमा प्रहरीलाई नै छक्याउने दाउमा काम गरिरहेका थिए। 

गुरुङको घर दाङको बरुवागाउँ हो, प्रहरीले टरीगाउँ बाट समात्यो।

१५ वर्षसम्म लुकिछिपी भारतमा बसेका गुरुङ पाँच वर्षअघि दाङमै फर्किएर प्रहरीकै पोल्ट्रीफार्ममा काम गरिरहेका थिए। गोप्य सूचनाको आधारमा पत्ता लागेपछि इलाका प्रहरी कार्यालय तुलसीपुरले पक्राउ गरेको प्रहरी नायव उपरिक्षक अनिल ठकुरीले जानकारी दिए। 

ठकुरीका अनुसार आपसी विवादमा २०६२ साउन १४ गते तुलसीपुरकै अश्वारा घर भएका ससुरा काशीराम विकको हत्या गरेर पत्नीसहित फरार भएका थिए।

भारत गएर उनी कहिले लुधियाना र कहिले बहराइचमा बसेका उनले गाडी चलाउने काम गरेको पनि अनुसन्धानका क्रममा खुलेको छ। यसबीचमा लुकिछिपी दाङ आउने गरेका उनी पछिल्लो समय तुलसीपुरको टरिगाउँमा बस्दै आएका थिए।

पछिल्लोपटक दाङ आएका उनी शुभलक्ष्मी पोल्ट्री फार्मको गाडी चलाउने गर्दथे जुन एक जना प्रहरी हबल्दारका बुवाको हो। 

‘कर्तव्य ज्यान मुद्दाको २० वर्षे हदम्याद साउनमा सकिँदै थियो। तर हत्यामा संलग्न बीरबहादुरलाई पक्राउ गर्न हामी सफल भयौं’, डीएसपी ठकुरीले भने।

कानुनी रुपमा उम्किनका लागि ठ्याक्कै आइतबारको मितिले दुई महिना मात्र बाँकी थियो। तर, प्रहरी २० बर्षपछि पनि सफल अनुसन्धानमा अब्बल ठहर भएको यो गतिलो उदाहरण हो।