डिभोर्ससहित अंशमुद्दा हालेकी अभिनेत्री अरुणिमा लम्सालले दोस्रा पति माथि लगाएका मुख्य अभियोग

काठमाडौं– बिहे गरेको नौ महिनामा नै पति युवराज श्रेष्ठलाई डिभोर्सको मुद्दासहित अंश मागदाबी गरेकी अभिनेत्री अरुणिमा लम्सालले विभिन्न अभियोग लगाएकी छन्। 

वारेसनामामार्फत मुद्दा दर्ता गराएकी अभिनेत्री लम्सालका युवराज दोस्रा पति हुन्। यता हल्ला गरेर अमेरिका फर्किएकी उनले सुनसरी जिल्ला अदालतमा मुद्दा दर्ता गराएकी छन् जहाँ बिबाह दर्ता समेत भएको थियो।

पतिको सम्पत्तिलाई परिवारमा ६ भाग लगाएर त्यसको एक भागको आधा भाग आफूले पाउनुपर्ने उनले फिरादपत्रमा उल्लेख गरेकी छन्।

युवराजको परिवारमा बुवा, दुईवटी आमा, एक दाजु र एक भाइ रहेको हुँदा मुल अंश ६ भाग लगाउने प्रस्ताव उनले गरेकी हुन्। युवराजले पाउने एक भागको आधामा उनको दाबी छ।

विवाहको दुई दिनपछि नै उनी पतिलाई छोडेर अमेरिका गएकी थिइन् भने त्यसपछि उनीहरुको भेट नै नभई सम्बन्धविच्छेदको मुद्दा अदालत पुगेको छ।

विभिन्न अन्तर्वार्तामा अरुणिमाले विवाहपछि पतिसँग एक रात पनि नसुतेको बताएकी थिइन्।

अरुणिमाका युवराजमाथिको प्रमुख आरोप झूठ बोलेर बिहे गरेको भन्ने छ। आफूलाई सिँढी बनाएर अमेरिका आउनका लागि मात्रै विवाह गरेको उनले बताएकी छन्। युवराजले आफूलाई नेपालको प्रतिष्ठित व्यापारी र राजनीतिकर्मीका रूपमा चिनाएको तथा पूर्वप्रधानमन्त्री शेरबहादुर देउवा र पूर्वमन्त्री ज्ञानेन्द्रबहादुर कार्कीसँग विशेष सम्वन्ध रहेको बताएको अरुणिमाको भनाइ छ।

युवराजले अरुणिमालाई स्नातकोत्तर अर्थात् एमए पास गरेको भनी ढाँटेको पनि उल्लेख गरेकी छन्।

विवाहपश्चात पतिले आफूलाई घरमा नलगी काठमाडौं लगेको अरुणिमाले बताएकी छन् । 

फिराद पत्रमा भनिएको छ,‘कामका लागि शैक्षिक प्रमाणपत्र माग गरें तर आलटाल गरी ढाँटे। सोपश्चात निजलाई सामाजिक सञ्जालबाटै फोन सम्पर्क गरी पति पत्नीको को सम्बन्ध विश्वासमा चल्नुपर्नेमा तपाईंले मसँग झुट्टा फरेबी कुरा गरी, गलतफहमीमा पारि मलाई झुक्याई अमेरिका प्रवेश गर्ने नियतले मात्र विवाह गर्नु भयो, तपाईंको यो व्यवहारबाट म अत्यन्त मानसिक पीडामा छु भनेँ।’

फिरादपत्रमा अगाडि भनिएको छ,‘उहाँले मेरो अमेरिका जाने रहर थियो, तिमीसँग त्यति कुरा नगरेको भए तिम्रो र मेरा बीचमा विवाह हुने थिएन। विवाह नभएको भए म सजिलै अमेरिका आउन सक्ने थिइनँ भनि अपशब्द प्रयोग गरी गालीगलौज समेत गरेकोले म अत्यन्त मानसिक पिडामा परेँ।’