बहिस्कारले फिल्म नचल्ने हुन्छ र? राजावादीले डुबाएको होइन सुरक्षा पन्तको खेल

नेपाली फिल्म उद्योगमा सुरक्षा पन्त एक चर्चित नाम हो । हाल उनको अभिनय रहेको फिल्म खेल हलहरूमा प्रदर्शन भइरहेको छ । तर, यो फिल्मको प्रदर्शनसँगै एउटा विवाद पनि जोडिएको छ । 

सुरक्षा पन्तले पूर्वराजा ज्ञानेन्द्र शाहका नाती हृदयेन्द्रलाई फिल्ममा खेल्दा राम्रो हुन्छ भन्ने अभिव्यक्ति दिएको भन्दै राजावादीहरूले रिसाएर फिल्म बहिस्कार गर्ने प्रतिक्रिया दिइरहेका छन् । सोहीअनुसार अहिले सामाजिक सञ्जालमा सुरक्षा पन्तलाई गाली गर्ने र फिल्म बहिस्कारको आह्वान गर्ने क्रम जारी छ । 

सामाजिक सञ्जालमा फिल्मले कमाइ नगर्नुको कारण राजावादीहरूको बहिस्कार नै हो भन्ने हल्ला पनि फैलिएको छ । तर, के साँच्चै राजावादीहरूको बहिस्कारले फिल्म नचलेको हो? के कलाकारहरू विवादमा पर्दैमा वा कसैले बहिस्कारको आह्वान गर्दैमा फिल्म असफल हुन्छ? 

के साँच्चै नै बहिस्कारको असर पर्छ फिल्ममा?

कुनै पनि फिल्मको सफलता वा असफलता धेरै कुरामा निर्भर हुन्छ । फिल्मको कथा, अभिनय, निर्देशन, संगीत र प्रचार–प्रसारले ठूलो भूमिका खेल्छन् । कुनै समूहले बहिस्कारको आह्वान गर्दा फिल्मको व्यापारमा केही आर्थिक क्षति हुन सक्छ, तर त्यसले मात्र फिल्मको समग्र सफलता निर्धारण गर्दैन । 

यदि फिल्मको कन्टेन्ट बलियो छ र दर्शकको रुचिअनुसार छ भने बहिस्कारको प्रभाव न्यून हुन्छ । इतिहासमा यस्ता धेरै उदाहरण छन्, जहाँ बहिस्कारको अभियान भए पनि फिल्मले राम्रो प्रदर्शन गरेको छ ।

नेपाली फिल्म उद्योगमा छक्का पञ्जा सिरिज बहिस्कारको अभियानलाई जितेर सफल भएको बलियो उदाहरण हो ।  

छक्का पञ्जा १ फिल्म हलमा चलिरहँदा एक व्यक्तिले युट्युबमा अपलोड गरिदिए । फिल्म टिमले प्रहरीमा उजुरी गरेपछि ती व्यक्तिले डरले आत्महत्या गरे । त्यसपछि सामाजिक सञ्जालमा फिल्म टिमलाई मान्छे मारेको आरोप लगाउँदै बहिस्कारको अभियान चल्यो । तर, फिल्मले त्यो समयकै सर्वाधिक कमाइ गर्न सफल भयो ।  

छक्का पञ्जा ४ प्रदर्शन अघि दीपाश्री निरौलाले राजेश हमाललाई महानायक नभनेको भन्दै विवाद भयो । बहिस्कारको अभियान चल्यो, तर फिल्मले बक्स अफिसमा उत्कृष्ट प्रदर्शन गर्यो ।  

छक्का पञ्जा ५ लाई कतिपयले टेलिसिरियल र जोकरहरूको फिल्म भन्दै बहिस्कार गर्न आह्वान गरे । तैपनि, फिल्मले राम्रो व्यापार गर्यो । 

बलिउडमा पनि यस्तै उदाहरण छ । सन् १९९३ मा मुम्बई बम काण्डमा संलग्न भएको आरोपमा सञ्जय दत्त पक्राउ परे । उनी जेलमा रहेकै बेला उनको फिल्म खलनायक प्रदर्शनमा आयो । त्यतिबेला सञ्जयको छवि नकारात्मक थियो र उनलाई देशद्रोहीको आरोप लागेको थियो । तर, खलनायक सुपरहिट भयो र उनको करियरको महत्त्वपूर्ण फिल्म बन्यो । यसले प्रमाणित गर्छ कि फिल्मको कन्टेन्ट बलियो भए विवादले खासै असर गर्दैन ।

सुरक्षा पन्तको फिल्ममा बहिस्कारको प्रभाव

सुरक्षा पन्तको फिल्म खेलको सन्दर्भमा पनि यही कुरा लागू हुन्छ । राजावादीहरूको बहिस्कार र सामाजिक सञ्जालको गालीले फिल्मको प्रचारमा केही असर परेको हुन सक्छ । तर, फिल्म नचल्नुको कारण केवल बहिस्कार मात्र हो भन्नु गलत हुन्छ । फिल्मको कथा, प्रस्तुति, दर्शकको रुचि, प्रचारको कमी वा अन्य प्रतिस्पर्धी फिल्महरूको प्रभाव पनि कारण हुन सक्छन् । बहिस्कारले केही दर्शकलाई रोके पनि समग्र व्यापारमा त्यसको असर सीमित हुन्छ ।

फिल्म उद्योगमा एउटा भनाइ प्रचलित छ, “कन्टेन्ट इज किङ ।” अर्थात्, फिल्मको कन्टेन्ट नै सबैभन्दा महत्त्वपूर्ण हुन्छ । यदि फिल्मको कथा, अभिनय र प्रस्तुति दर्शकको मन छुन्छ भने कुनै विवाद वा बहिस्कारले त्यसलाई रोक्न सक्दैन । 

बहिस्कारले फिल्ममा केही आर्थिक असर पार्न सक्छ, तर त्यसले मात्र फिल्म नचल्ने भन्ने हुँदैन । फिल्मको सफलता वा असफलता कन्टेन्टको गुणस्तरमा निर्भर हुन्छ । सुरक्षा पन्तको फिल्म खेल को सन्दर्भमा पनि राजावादीहरूको बहिस्कारलाई मात्र दोष दिएर विश्लेषण गर्नु अपूर्ण हुन्छ । फिल्मले अपेक्षित सफलता नपाउनुको पछाडि अन्य कारणहरू पनि हुन सक्छन् । 

त्यसैले, यो भन्न सकिन्छ कि बहिस्कारले फिल्म डुबाउँदैन, बरु फिल्म आफैंले आफ्नो बाटो बनाउँछ । अब प्रश्न तपाईंमाझ छ — के तपाईं बहिस्कारको हल्लाले फिल्म हेर्न छाड्नुहुन्छ, कि कन्टेन्ट हेरेर निर्णय गर्नुहुन्छ?