काठमाडौँ - चर्चित गायक दुर्गेश थापाको नयाँ गीतको प्रसारण बन्द गर्न माग गरिएको छ । दुई दिनअघि युट्युबमा सार्वजनिक गरिएको 'पैसा' बोलको गीतको भिडियोमा सभ्य समाजमा पाच्य नहुने खालका शब्दहरू प्रयोग गरिएको भन्दै वैज्ञानिक समाजवादी महिला सङ्गठनले प्रसारण बन्द गर्न आग्रह गरेको हो ।
सङ्गठनले एक विज्ञप्ति जारी गर्दै गीत प्रसारण बन्द गर्न सम्बन्धित संस्था र राज्यका निकायलाई अनुरोध गरेको हो । यसअघि पनि थापा आफ्नो गीतकै कारण विवादमा तानिदै आइरहेका थिए ।
सङ्गठनले विज्ञप्तिमा भनेको छ - 'कलाकारले प्रयोग गर्ने शब्द, वेशभूषा र प्रस्तुतिले समाजमा अल्पकालीन र दीर्घकालीन असर पार्दछ, नेपाली समाजमा महिलामाथि हुने बला-त्कारजन्य हिंसा, मानसिक र शारीरिक रूपमा हुने हिंसा वृद्धिमा सिनेमा, साहित्य र गीतमा महिलाको गरिमा र अस्तित्वलाई सस्तो र महिलाद्वेषी प्रस्तुत पनि एक कारण हो'
