रिलिजको पूर्वसन्ध्यामा चलचित्र ‘लप्पन छप्पन २’को प्रिमियर सम्पन्न भएको छ । राजधानीको बिग मुभिजमा सम्पन्न प्रिमियरमा चलचित्रकर्मी र पत्रकारहरुको उपस्थिती रहेको थियो ।

प्रिमियर शोमा चलचित्रले सकारात्मक प्रतिक्रिया बटुलेको छ । एक्सन जनराको सस्पेन्स थ्रिलर चलचित्रले राजनीति र अपराधको जालोको कथा भनेको छ । मुकुन्द भट्ट निर्देशित चलचित्रको मेकिङ र एक्सनलाई धेरैले रुचाएका छन् । 

प्रिमियर पछि उपस्थित चलचित्रकर्मीले ‘लप्पन छप्पन २’ले मल्टीप्लेक्समा नेपाली चलचित्रका दर्शक फर्काउने अपेक्षा राखेका छन् । चलचित्र बिकास बोर्डका सदस्य अर्जुन कुमार, कमेडियन हिमेश पन्त, कलाकार नरेन खड्कालगायतले चलचित्रको प्रसंसा गरेका छन् ।

प्रिमियरमा चलचित्रका मुख्य कलाकार सौगात मल्ल र अनुप बिक्रम शाही बाहेक लगभग सबै कलाकार उपस्थित थिए । सौगात र अनुप चलचित्र  ‘लाखे’को छायांकनका लागि मुस्ताङमा भएकोले प्रिमियरमा उपस्थित हुन नसकेको जनाइएको छ । प्रिमियरमा निर्देशक मुकुन्द भट्ट सहित चलचित्रका कलाकारहरु अर्पण थापा, शिव श्रेष्ठ, शक्ति श्रेष्ठ, बिशाल पहाडी, बेल्जियमकी अभिनेत्री क्यारोलिन कोलिन्डालगायत उपस्थित थिए ।

नेपाल, अष्ट्रेलिया र युरोपमा छायाँकन गरिएको चलचित्र सन् २०१७ को  ‘लप्पन छप्पन’को यो दोस्रो सिरिज हो । चलचित्र शुक्रबारबाट देशभर प्रदर्शन हुँदैछ ।