काठमाडौं– रुसी आक्रमणको सामना गरिरहेको युक्रेनका राष्ट्रपति भोलोदिमिर जेलेन्स्कीले युद्धमा घाइते भएका सैनिक भेट्न अस्पतालको भ्रमण गरेका छन् । युक्रेनको रक्षामन्त्रालयले जेलेन्स्कीले घाइते सैनिकलाई भेट्न अस्पतालको भ्रमण गरेको जनाएको हो ।

यद्यपि उनले भ्रमण गरेको अस्पतालको पहिचान भने गोप्य राखिएको छ । युक्रेनको रक्षामन्त्रालयले सामाजिक सञ्जालमार्फत् सार्वजनिक गरेको भिडियोमा राष्ट्रपति जेलेन्स्कीले उपचार गराइरहेका सैनिकहरुसमक्ष पुगी उनीहरुको गुनासो र अवस्थाबारे जानकारी लिएको देखिन्छ । जेलेन्स्कीले घाइते सैनिकलाई शीघ्र स्वास्थ्यलाभको कामना गरेको जनाइएको छ ।

केही घाइते सैनिकले उनीसँग सेल्फी पनि खिचिरहेको भिडियोमा देखिन्छ । साथै भ्रमणका क्रममा जेलेन्स्कीले सैनिक एवम् अस्पतालका कर्मचारी तथा चिकित्सकलाई तक्मा र विभूषण समेत प्रदान गरेको जनाइएको छ ।

सैनिकहरुलाई उनले ‘युक्रेनको रक्षक’ विभूषण प्रदान गरेको अमेरिकी अनलाइन समाचार पोर्टल एक्सिओसले जनाएको छ । रुसी आक्रमणसँगै युक्रेनभर भिषण लडाईं भइरहेका बेला जेलेन्स्कीले घाइते सैनिकलाई भेट्न अस्पतालको भ्रमण गरेका हुन् ।

– एक्सिओस र बीबीसीबाट
– तस्वीरः ट्विटर/युक्रेनी रक्षामन्त्रालय