काठमाडौँ । लन्डनका चर्चित युवा निर्देशक कुशल श्रेष्ठको छांयाकन, सम्पादन र निर्देशनमा अर्को नयां रोमाञ्चक म्यूजिक भिडियो सार्वजनिक भएको छ । शनिबार लन्डन प्लमस्टिडस्थित गोर्खा क्लवमा एक कार्यक्रमबीच अमिका महत क्षेत्रीको ‘मन मनै त हो’ भिडियो सार्वजनिक भएको हो । दुई कन्या काव्या श्रेष्ठ र बृष्टि पुन श्रेष्ठले म्यूजिक भिडियो सार्वजनिक गरेका थिए । अर्जुन रत्न भिखारीको शब्द, सुनिल मास्केको संगीत, मेलिना राईको स्वर रहेको गीतमा लन्डनका विभिन्न रमणीय दृश्य राखेर भिडियो बनाइएको छ । म्यूजिक भिडियोमा लन्डनका लोकप्रिय नायक ध्रुव दत्त र अमिका महतको अभिनय छ । मिसेस नेपाल यूकेमा सहभागी अमिकाको यो डेब्यू प्रोजेक्ट हो । म्यूजिक भिडियो सार्वजनिक कार्यक्रममा कलाकारहरु ध्रुव दत्त र अमिका क्षेत्रीले आ आफ्नो अनुभव सुनाएका थिए । उनीहरुले कुशलको निर्देशकीय क्षमता र गाइडेन्समा काम गर्न निकै सहज भएको बताए । वक्ताहरुले बेलायतमा सिमित श्रोत साधनबीच पनि म्यूजिक भिडियो निरन्तर आइरहनु नेपाली गीत संगीत र श्रष्टाका लागि सकारात्मक पक्ष भएको धारणा राखे । पहिलोपटक म्यूजिक भिडियोमा अभिनय गरेकी अमिका चर्चित नाट्यकर्मी स्वर्गीय जीतेन्द्र महत अभिलाषीकी सुपुत्री हुन् । अमिकाले म्यूजिक भिडियो हेरेर आफ्नो पहिलो प्रयासमा भएका कमी कमजोरी औंल्याइदिन आग्रह गरेकी छन् । कार्यक्रमकै अवसरमा टिम मेम्बर आशिष श्रेष्ठको जन्मोत्सव समेत मनाइएको थियो । कार्यक्रममा इनास यूकेले कलाकारलाई सम्मान गरयो ।