काठमाडौँ – भारत पेट्रोलियम पदार्थको मूल्य फेरि बढाइएको छ । भारतीय आयल मार्केटिङ कम्पनीहरुले शुक्रबार डिजेल–पेट्रोलको मूल्य प्रतिलिटर ८० पैसा वृद्धि गरेका हुन् । पछिल्लो एक सातामा यो तेस्रोपटक मूल्य वृद्धि भएको हो ।
यसअघि चार महिनापछि पहिलोपटक गत मंगलबार पेट्रोलियम पदार्थको मूल्य बढेको थियो।
पछिल्लो चार दिनमा पेट्रोल र डिजेलको मूल्य २ रुपैयाँ ४० पैसा बढेको छ । भारतको राजधानी दिल्लीमा पेट्रोलको मूल्य ९७ रुपैयाँ ८१ पैसा र डिजेलको मूल्य ८९ रुपैयाँ ०७ पुगेको छ।
भारतको ठूला तेल कम्पनी आईओसी, बीपीसीएल र एचपीसीएलले कच्चा तेलको मूल्यमा भारी वृद्धि हुँदै गर्दा नोभेम्बर र मार्चको सुरुवातमा पेट्रोल र डिजेलको भाउ नबढाएको जनाएका छन् । जसबाट ती कम्पनीहरुलाई करिब २ अर्ब भन्दा बढीको क्षति पुगेको जनाइएको छ ।
भारतमा पेट्रोलियम पदार्थको मूल्य वृद्धि भएसँगै त्यसको असर नेपालमा पनि पर्ने देखिएको छ । आईओसीले पठाउने मूल्य सूची बढेर आएसँगै नेपाल आयल निगमले पनि निरन्तर भाउ बढाउँदै लगेको छ ।
