काठमाडौँ– हलिउड अभिनेता विल स्मिथले ओस्कर अवार्ड समारोहको मञ्चमा कमेडियन कलाकार क्रिस रोकमाथि थप्पड हानेको घटनामा माफी मागेका छन् । सोमबार बिहान भएको एकेडेमी अवार्ड कार्यक्रमका बीच स्मिथले रोकलाई थप्पड हानेका थिए । उक्त घटना अस्वीकार्य र अक्षम्य भन्दै स्मिथले इन्स्टाग्राममार्फत सार्वजनिक रुपमा माफी मागेका हुन् । आफूले सीमा नाघेको र गलत गरेको उनले स्वीकारेका छन् । ओस्कर फिल्म एकेडेमीले समेत उक्त घटनाको निन्दा गर्दै समीक्षा गर्ने घोषणापछि स्मिथले आफूबाट गल्ती भएको स्वीकार गरेका हुन् । कमेडियन रोकले कार्यक्रमकाबीच स्मिथकी पत्नी जेडा पिन्केटमाथि मजाक गरेका थिए । उक्त मजाकपछि स्थिम मञ्चमा गएर रोकलाई थप्पड हानेका थिए । स्मिथ यस वर्षको ओस्कर अवार्डमा सर्वाेत्कृष्ट अभिनेताका उपाधि विजेता पनि हुन् ।