काठमाडौँ - इटालियन 'सिरि ए' मा शीर्ष स्थानको एसी मिलान बराबरीमा रोकिएको छ। अप्रत्यासित रुपमा मिलान बोलोग्नासँग गोलरहित बराबरीमा रोकिएपछि उपाधि होड थप रोमाञ्चक बनेको छ। सोमबार राति भएको खेलमा बराबरीले मिलानलाई शीर्ष स्थानमा ३ अंकको अग्रता बढाउने अवसर गुमेको छ। शीर्ष स्थानको मिलानको अब दोस्रो स्थानको नापोलिसँग केवल १ अंकको दूरी छ। ३१ खेलको समाप्तिमा एसी मिलान ६७ अंकका साथ शीर्ष स्थानमा रहँदा नापोली समान खेलबाट ६६ अंकका साथ दोस्रो स्थानमा छ। एक खेल कम खेलेको इन्टर मिलानको ६२ अंक रहेको छ। बोलोग्ना ३४ अंक जोडेर १२ औं स्थानमा रहेको छ । प्रतिस्पर्धात्मक बनेको खेलमा साविक च्याम्पियन एसी मिलानलाई बोलोग्नाले कडा चुनौती दिएको थियो। मिलानका लागि फ्रेन्च फर्वाड ओलिभर जिरुड तथा ज्लाटन इब्राहिमोभिचले सानदार गोलको प्रयास गरेका थिए। तर उनीहरुको प्रयास सफल हुन नसक्दा २ अंक गुमाउन मिलान बाध्य भयो।